meme緊你幫緊你 ──

搏定唔搏，不如學識轉膊

搏一搏，單車變摩托？

要短時間滾大筆錢，好容易就會諗重鎚出擊做高風險投資搏高回報。冷靜啲先（衝動是魔鬼呀），市場呢回事，無人可以準確預測，高風險從來唔保證一定高回報，搏唔贏隨時損手爛腳甚至翻身無望。例如2008年嘅金融海嘯，一年間股市大上大落，恒生指數最高位同最低位相差超過六成。如果你喺當年準備退休，諗住放手一搏大手投資咗喺股票市場，份退休金就真係大幅縮水啦。

想儲錢？由睇住盤數開始

唔夠錢，又承受唔到高風險，係咪就退唔到休？又唔使咁灰住嘅，與其將個煩惱交畀將來嘅自己，不如趁而家仲有穩定嘅工作同收入，儲多個錢傍身，等退休嗰陣安樂啲。最直接嘅方法，梗係從管理自己嘅開支開始，了解自己平時使幾多、使咗去邊，先可以諗諗邊啲位有得儲多啲。

不過返工已經夠多嘢要記，邊度仲夠RAM去記自己盤數？！醒個方法幫幫你，坊間有唔少手機記帳app，可以幫你mark低自己嘅日常使費，進階啲嘅仲有埋圖表將所有開支分門別類咁show出嚟，邊類消費使你最多錢即刻無所遁形。如果非必要嘅消費佔多，嗰啲位就可以節制下，將慳咗嘅錢儲起佢（擺脫月光族嘅第一步）。

私心推介呢個app，有齊啱啱講嘅功能之餘，仲有個計數機算一算你要幾錢先退到休（step by step 教埋你點計），幫你由管理使費到plan退休開支all in one搞掂！介紹番，呢個app仲要係免！費！㗎！

儲錢慳錢Why not both?

慳慳埋埋儲多咗嘅錢，如果就咁擺喺度，到廿幾三十年後退休嗰時隨時已經因為通脹而無咁值錢，即係削弱咗第時嘅購買力（肉都赤埋）！所以記住呢筆錢都要做適當嘅長線投資。其中一個可以考慮嘅係強積金可扣稅自願性供款 (TVC)，勝在供款有彈性，仲有得扣稅，即係儲錢嘅同時又再慳咗錢！而且供款去到65歲先拎，可以防止自己手痕未到退休就使咗筆老本添。 如果你仲擔心緊退休嗰下手頭上嘅老本唔夠應付再老啲嗰陣嘅生活開支，咁點算好？機會嚟喇飛雲，過多你最後一招，plan定退休後嘅資金安排，做好兩手準備。

退休唔係dead-deadline

本來諗住「他他條條」開始第二人生，結果變成老本籌旗嘅延長戰，的確會為啱啱步入長者階段嘅自己再添多重壓力。想減輕呢個負擔，就要學識「邊使邊滾」。

退休儲備有出無入，愈到後期啲錢就一定愈唔見使。如果可以逐少提取需要用嘅短期資金（邊使），然後將遲啲先要用到嘅錢繼續進行投資（邊滾），用時間換取額外嘅投資機會，盡量抵銷通脹造成資產貶值嘅影響之餘，都有機會令自己副身家有啲進帳。 至於你嘅MPF，雖然到咗65歲可以一次過拎晒出嚟，戶口多咗一筆錢的確幾興奮，但佢其實都係屬於你嘅退休儲備其中一部份，應該要連埋你其他儲蓄一齊按上面所講嘅方法去部署。如果你到時希望將部份或全部嘅MPF繼續留喺戶口投資滾存住先，係可以選擇分期提取或者全數保留，唔一定要一筆過拎晒㗎，咁分配退休儲備就更靈活。

想安安樂樂過個搵夠退休嘅下半世，最好嘅方法就係盡早開始plan，今日投資多啲落退休生活上，配合埋啱自己嘅投資組合同策略，為未來嘅自己滾存銀彈，咁退休就更加secured啦！