父母退休無plan，獨生子女唔使諗財務自由?
努力讀書希望日後搵份人工唔錯嘅工然後享受生活，係好多年青人嘅目標。如果係自己搵、自己使，比較容易掌握自己嘅生活。但若果係一份人工兩份分、甚至乎三個人分呢？咁就唔同講法喇。
作為獨生女嘅Solo，踏入三字頭，工作亦算平步青雲，有唔錯嘅收入，正享受單身生活。佢「原本」以財務自由為目標，打算趁後生努力賺錢，再利用投資賺取被動收入，部署提早退休……
近幾十年，香港家庭都係以「一孩家庭」為主。作為獨生子女，細個嗰陣萬千寵愛在一身，但到自己出咗身、父母年紀又開始大，會唔會變咗家庭負擔在一身？
但Solo發現，仲有十幾年就退休嘅父母，竟然一直都無周詳嘅退休策劃。直到佢哋睇咗一個報導，講兩夫婦拎住幾百萬退休都只係夠糊口，先開始擔心自己嘅老本未必夠用。Solo開始諗，如果父母唔夠錢退休，自己就要一個人孭起供養佢哋嘅開支，咁係咪要放棄財務自由嘅目標？
計一計數，二選一以外嘅出路
面臨兩難嘅Solo，其實仲有出路，關鍵就係佢父母仲-有-十-幾-年-先-退-休！Solo可以趁而家同父母一齊計劃，睇下點樣利用呢段話短唔短、仍然有收入嘅十幾年時間增加退休儲備，減低佢日後要獨力供養父母嘅財政壓力。要plan退休，首先要計一計：
- 退休要使幾多錢
- 預計會儲到多幾多錢
- 有咩會影響使錢／儲錢嘅速度
萬一條數計出嚟真係唔夠退休，佢哋可以從兩方面入手，盡量收窄番個差距：
- 退休前開源 - 好天斬埋落雨柴
參考退休策劃計算機嘅儲蓄建議，把握仲返緊工嘅時間增加儲蓄，同埋善用長線投資令儲蓄增值 - 退休後節流 - 睇餸食飯
重新審視預想中嘅退休生活，考慮調整一啲非必要開支（例如由每年兩次旅行變成每年一次？）
有限儲備，無限提取？
退休策劃除咗開源節流，有技巧咁去「搣」份老本都同樣重要。講緊嘅係退休後有策略咁喺儲備度拎錢出嚟用，再將未用得著嘅儲備繼續做適當嘅投資避免俾通脹蠶食，甚至有增值。唔使淨係擔心份老本唔夠搣，反而仲有機會做到越搣越有。
如果都仲覺得有啲徬徨嘅，聽埋專家分享理財祕訣，幫助年近半百又無退休策劃概念嘅人plan好人生下半場！