養兒一百歲，真係要到九十九先諗退休？
多年前有個廣告，其中一句對白令好多父母為之震撼：「養大一個小朋友要400萬。」今時今日，呢個經典已經變成歷史，湊大一個小朋友嘅花費亦遠超呢個數字。
有人可能因而對生兒育女卻步；相反，仍然選擇為人父母嘅，就比上一代更加廿四孝，人生嘅priority都放晒喺仔女身上。甚至顧住俾仔女「贏在起跑線」，忘記咗自己嘅人生賽道其實都要衝線。
今年40歲嘅阿Man同太太都係專業人士，收入理想。由於兩夫婦都喜歡小朋友，所以婚後就算貴啲都揀咗個校網好嘅地區置業，之後屋企亦迎來一位新成員仔仔。阿Man同太太係名副其實廿四孝父母，幾乎每一個決定都係以仔仔為先，而仔仔喺佢哋悉心栽培下都好乖好醒目，啱啱先入咗一間唔錯嘅國際學校。
聽落happily ever after嘅美滿生活，其實有一個隱憂。
自從仔仔出世後，即使兩夫婦收入唔錯，要應付有增無減嘅開支都開始無咁鬆動。衣食住行、供樓、外傭姐姐、仔仔嘅興趣班、書簿雜費等，仲要預留筆錢未來俾仔仔出國留學……阿Man作為屋企嘅CFO，深感每分每毫都不容有失，穩陣起見，佢採取cash is king嘅理財策略，謝絶投資以避免損失，甚至連廿幾年後先拎嘅MPF都全數放喺強積金保守基金。
阿Man忽略咗現金儲蓄係唔識增值，長遠會跑輸通脹；今日睇落都幾好用嘅儲蓄，將來都有機會變得唔見使。日後小朋友出咗身，兩夫婦終於可以專注返自己條跑道嘅時候，可能係已經臨近退休嘅年紀，如果到時先發現手上嘅現金貶值唔夠過下半世， 唔通要仔仔一個養兩老？廿四孝嘅阿Man又點會想成為仔仔嘅負擔？
咩係投資，你真係知？
要解決呢個難題，首先要糾正阿Man對投資嘅迷思同誤解。好多人都以為投資就係短炒，高風險易輸錢，聽到都避之則吉。其實除咗搵快錢嘅短線操作，仲有追求長遠資產增值、可利用時間降低投資風險嘅長線投資。投資市場隨住經濟週期起跌係正常現象，短期嚟講就更容易因為各種原因如市場消息／氣氛等而上上落落。但一般嚟講，有質素嘅資產喺長遠、宏觀嚟睇價格都會增長，就算中間有起跌，長期持有嘅投資者都相應能夠做到資產增值。換句話說，長線投資（特別以十數年起計）可以利用時間抵禦市場短期波動，降低投資風險。
同樣地，阿Man嘅其他儲蓄，如果喺未來幾年時間內未需要動用嘅話，都可以考慮用咁樣嘅模式管理㗎。
兩招輕鬆管理風險
不過唔少同阿Man一樣謹慎嘅人可能仍然覺得危機四伏：「拉長十幾二十年睇係有增長，但如果中間高位入錯市都有排坐艇喎……」
「揀啱資產就長遠增值，揀錯咪無得翻身？」
呢啲都係合理嘅憂慮，以及投資真實要面對嘅風險。但除咗逃避，可以試下利用一啲投資策略嚟做好風險管理：
- 平均成本法
- 用定期、定額嘅方式投資，代替整筆資金一次過入市。
- 每次用相同金額以市價買入資產，當資產價格上升，會買入較少單位，當價格下跌，同樣嘅金額就可以買入較多單位。強積金每月定額供款就係一個應用例子。
- 長遠而言，呢個策略有「拉上補下」嘅效果，拉勻資產嘅買入價，有助抵禦市場短期波動，免除入錯市嘅憂慮。
- 分散投資
- 將資金分散投資喺多種唔同種類、唔同地區嘅資產
- 投資風險除咗取決於資產種類（如股票、債券、現金等）外，仲會受所投資地區嘅社會、政治、經濟變動（包括利率升降、信貸評級、投資市場波動同個別行業表現）等因素影響。
- 如果投資組合內嘅資產嘅多元性高而相關性較低，當個別資產價格／地區市場出現波動嘅時候，組合內其他資產未必會受影響，從而可以減低投資風險。