積場生涯攻略 ── 以為儲唔儲都唔差幾多嘅日子，我哋都經歷過

最細嗰個表弟啱啱出嚟做嘢無耐，無份工做得長，於是我早排就用激將法挑戰佢，如果份新工過到試用期，就會請佢食餐好。出到嚟不斷聽佢呻呢樣呻嗰樣，猛咁攞新公司同舊公司比較。橫掂我準備食完飯之後跑步，餐飯都要時間消化，即管聽下佢有咩咁不滿。

表弟話對新公司嘅環境、人事同假期都唔慣！愈講愈躁底，一怒之下話想出部新電話洩憤，個價錢幾乎係佢成份人工。佢覺得做嘢咁辛苦要獎勵自己，仲話好多同佢一樣喺職場食物鍊最底層嘅新人都慣咗「長期糧尾」嘅生活。儲錢？「儲唔儲都唔差幾多」喎！

「你而家就話冇女朋友啫，如果遲啲有拖拍甚至去到成家立室嘅階段，繼續餐搵餐食餐餐清咪好危？再諗遠少少，若果第時有埋小朋友，自己係咪有能力畀到好嘅環境同生活下一代先？仲有，自己老咗之後又點算呢？」

「咁遠嘅事未諗到喎……」


廿幾歲仲後生，唔好話好難想像老咗身體機能會衰退，結婚、生仔、養家對佢嚟講都好遙遠。但殘酷嘅現實係到年紀大咗喇，呢啲本來好遙遠嘅問題就喺眼前，而我哋可能已經冇咁多「窿路」同埋精力搵錢，之前儲落嘅錢就會變得好重要，所以千祈唔好喺後生嘅時候洗腳唔抹腳。好似我由十八廿二就keep住跑步，腳部肌肉增強咗，而家人到中年先keep到好嘅體魄繼續搏殺，唔似啲零運動嘅朋友連上落樓梯都會膝頭哥痛！

諗起表弟讀書嗰陣係運動健將，投身職場之後成日話收咗工都攰到黐肺無動力去做運動，結果唔使兩年就肥咗幾個碼。我就用呢樣嘢同佢講，做運動同儲錢一樣，唔好睇小個「量」，持之以恆一定有收獲。舉個例，每日跑步20-30分鐘你覺得做唔做都無分別咩？試吓完全唔做運動吖，體形同體格可以差好遠。

「就好似我而家咁……」表弟望住自己就嚟俾個肚腩逼爆嘅裇衫，似乎明咗啲嘢。


好彩年輕就係本錢，而家落後咗唔緊要，仲有時間追得番。運動如是，儲蓄投資都一樣。當你廿幾歲出嚟社會工作，一開始可以儲嘅錢唔多，但前面條路起碼仲有40年，本來好少嘅錢逐啲逐啲儲同做啲適當投資好似「滾雪球」咁滾大佢，時間長唔覺唔覺就累積到一筆資產。所以後生時要養成一個習慣，一出糧就儲起一部份嘅錢，剩低嘅先用嚟應付生活開支，唔好俾自己慣咗使到盡，或者先使未來錢。

「我仲以為要慳到盡！咁即係都可以使錢，但要儲咗錢仲有閒錢先去諗消費？」醒目仔，一點就明！我哋可以試下用啲理財工具，例如「退休策劃計算機」嚟計自己嘅退休需要，訂立一個實在嘅儲蓄目標，然後逐啲逐啲完成目標。道理就好似練跑咁，按住自己嘅體能提升慢慢由每次跑3K增加到5K，再挑戰10K、半馬、全馬，咁先會越跑越遠。

「咁為咗我可以做到儲蓄目標，你會唔會考慮贊助我想買嗰部新電話？」

Well，佢會諗辦法開源節流，都算係一個好開始。