主頁 6大強積金投資決策點 5種主要強積金基金 5大退休策劃 實用工具及資源
挑選基金挑選計劃額外供款轉職處理調整組合退休處理 介紹「積」檔案一覽表 按人生階段策劃退休評估退休生活需要為退休累積財富檢討退休投資組合提取退休儲備 強積金投資資訊及工具退休策劃工具多媒體專區專題文章刊物及單張社交媒體平台詞彙表常用連結

積場生涯攻略 ──
七萬幾蚊嘅電視 vs 隔夜餸

舊同事:「之前嗰套燒腦戲,你唔得閒入戲院睇,我買咗Blu-ray喇!Weekend過嚟我度睇啦!」

我:「我啱啱上咗個5G加電影streaming嘅plan,隨時都有得睇啦!」

舊同事:「點同呢,我屋企好睇啲。」

我:「依家streaming都有4K同HDR啦,我喺屯門睇同你黃大仙睇唔同㗎咩?黃大仙睇精彩啲㗎?」

舊同事:「我意思係屋企部電視呀!我老豆啱啱退休,佢話多咗時間留喺屋企,唔想刻薄自己,豪使7萬幾蚊買咗部8K電視。」

我:「咁我過嚟吖,見識下一部7萬幾蚊嘅電視,同我屋企部5千幾蚊嘅電視有幾唔同?」

其實舊同事enjoy部8K電視之餘,都好擔心佢老豆喺退休初期太奢侈而虛耗儲備。我阿媽就啱啱相反,佢老人家退休之後慳過以前,咩都唔買,成日食隔夜飯餸。其實佢後生儲落咗筆私己錢,又有份強積金,加上有我畀家用,過啲飲下早茶、煮下家常便飯嘅退休生活應該都鬆動。我明佢嘅心態係好天收埋落雨柴,亦都唔想萬一有咩病痛增加我哋嘅負擔,但死慳死抵到完全犧牲晒生活質素,又會唔會錯失咗人生呢段樂得悠閒嘅日子呢?如果我阿媽同舊同事嘅老豆兩個人可以搓混啲就好喇。

退休唔好太慳,但又唔想使下使下日後先知使大咗,應該點?好似我阿媽咁,睇新聞見到香港人平均壽命成八、九十歲仲要係全世界最長命嘅,佢已經好驚,仲要見住啲柴米油鹽年年咁加價,但老本就得咁多,擔心收尾幾年唔夠錢使都好合理嘅!不過收埋啲錢喺餅乾罐度一味靠慳都都唔保證夠使到尾。

想老本長使長有,退休後都要繼續做適當投資!不過應該點投資先啱?呢個年紀,真係唔可以好似後生仔咁搏。比較穩陣嘅做法係將退休儲備入面足夠3至5年生活所需嘅cash留起,然後將預計5至10年後先會用到嘅錢投資喺債券基金、儲蓄保險之類嘅中度風險資產嚟追通脹,最後剩低嘅錢應該係起碼10年後先需要動用嘅,就可以諗下啲進取少少、預期長遠回報比較好嘅股票基金或者混合資產基金之類,為老本增值。

除咗做適當投資之外,退休後點樣拎MPF都有策略㗎!大家可以喺65歲後揀一筆過或者分期提取MPF,你可以善用呢個靈活性,再配合埋自己其他退休儲蓄嘅狀況,分配好幾時動用邊部分嘅儲備,然後再安排投資計劃。例如喺退休嗰陣你都有相對充足嘅cash flow,咁就可以考慮將MPF留喺帳戶入面繼續投資,或者暫時只拎部分出嚟做其他安排;相反,如果你嗰陣大部分資產係做緊一啲需要比較長時間先可以套現嘅投資,咁就可以諗下提取MPF嚟應付初期嘅生活開支。


其實道理好簡單,與其退休後好似我阿媽咁慳住使,或者好似同事阿爸咁豪使,不如而家就計劃好點使。只要為自己嘅強積金同其他退休儲備做好「提取有序、投資有道」嘅安排,咁就可以安心享受退休生活啦!
撰文:辦公室日報
按此瀏覽「積場生涯攻略」系列文章
×