中年追星，偶像星途緊要過自己將來?
呢啲應援活動除咗受外地追星文化影響，亦同「飯圈」中多咗一批成熟、有社會經驗同經濟能力嘅「新血」息息相關。佢哋對偶像嘅熱情不比後生嘅fans遜色，而且有更多「本錢」去課金應援。但義無反顧去追星嘅背後，有個關乎佢哋自身幸福嘅隱憂，一個唔覺意忽略咗，有機會想追都追唔番。
Fanny今年45歲，收入尚可，單身無家庭壓力，加上生活簡單開支唔多，所以即使一向無特定嘅儲蓄計劃，都有一定嘅儲蓄。佢諗住只要keep住咁樣有錢剩就儲起，都應該足夠應付退休。
兩年前，Fanny睇咗一個電視節目，俾其中一位明星嘅才華吸引，從此踏上追星之路，消費模式亦180度改變。為咗支持偶像，付費加入fans club係基本，有啲美術天份嘅佢仲會自資製作應援物品免費派發，偶像生日、有新作品推出亦例必參加集資落廣告，演唱會更加要搶購前排位置兼「全勤」去足咁多場……不經不覺使咗唔少錢。而家佢每個月勉強先有少少餘錢儲起，有時甚至會「月光」！雖然Fanny對呢個情況隱約覺得有啲唔妥，但呢刻嘅佢覺得偶像嘅星途發展分秒必爭，而自己就仲有排先退休，遲啲先儲番啲錢都應該無問題。
不過計下條數，假設65歲退休，之後有二、三十年無收入嘅日子要過。以Fanny而家嘅年紀，再遲啲先開始為退休打算，咪得番大約廿年去儲另外二、三十年要使嘅錢？ 唔通追星咁熱血嘅事只係後生仔女嘅專利？
又未至於咁非黑即白嘅。
想有錢使又儲到錢，有GPS guide住你
其實只要安排得好，儲錢同使錢並非「魚與熊掌」不可兼得；同樣地，支持偶像嘅同時都可以為自己做好退休策劃㗎。Fanny最大嘅問題係對自己嘅開支模式無概念，又無明確、恆常嘅儲蓄習慣。總之有錢就用，使剩先儲。佢之前生活簡單，無乜錢使所以可以儲到錢；到追星後支出大增就立即出事。想改善呢個問題，可以試下積金局嘅樂享退休GPS呢個免費app，利用佢嘅兩大功能建立良好理財習慣：
- 收支管理
- 簡單易用嘅記帳工具，仲有圖表分析收支狀況
- 透過記帳習慣了解自己日常開支模式，搵出能夠節省嘅非必要開支，從小銀碼開始建立持之以恒嘅儲蓄習慣
- 退休策劃計算機
- 只需要輸入簡單資料，即時估算到65歲退休時嘅儲蓄，以及應付理想退休生活所需金額
- 如果有差距，計算機會建議由而家開始每月額外嘅儲蓄金額
善用複息效應，增加儲備
Fanny計完數，發現自己去到65歲嗰陣嘅儲備，距離可以應付佢嘅理想退休生活仲差大嗱嗱100萬！個計算結果仲話由而家起每個月要儲多幾千蚊，先追得番條數，咁仲邊有閒錢搞應援？！又話儲錢退休唔使放棄追星嘅興趣，想兩樣都要唔通要靠奇蹟？無錯，如果識得善用被譽為「世界第八大奇蹟」嘅複息效應，儲錢同追星可以唔使二揀一！複息效應係指本金透過投資賺取回報，然後連本帶利再繼續滾存，只要投資時間夠長，啲錢就會好似滾雪球咁愈滾愈大。以Fanny要儲多100萬呢個目標嚟做例子，睇下複息效應嘅威力：
而且如果Fanny而家就開始為退休準備，唔只每個月可以輕鬆啲、拎少啲錢出嚟儲，長遠嚟計比起10年後先開始儲蓄足足拎少超過14萬嘅本金！所以只要好好運用複息效應，儲錢同時繼續追星其實唔難。
其實大部分香港人供緊嘅強積金，就係善用複息效應嘅好例子。強積金透過長達三、四十年嘅超長投資期，將大家每月嘅供款不停滾存增值，提供退休保障。如果Fanny唔想為額外嘅儲蓄做新嘅投資而煩惱，可以考慮喺每個月5%強積金供款以外，做額外嘅自願性供款，而且仲有三種唔同嘅供款安排可以揀，幫你靈活增加退休儲備，部分供款安排仲可以扣稅添。
善用複息效應嘅力量再配合自願性供款幫手，Fanny唔使負擔太多額外嘅金錢同時間就可以輕鬆做好退休策劃，要同時支持偶像同埋為自己退休做好準備easy job！