meme緊你幫緊你 ──

退休唔使做不是夢？

搵夠退休，搵幾多先夠退休？

坊間就有一個統計，2020年香港退休人士嘅平均每月開支係$11,500。我哋就用呢個數幫一個40歲嘅打工仔計下要幾多錢先叫做「搵夠退休」： 如果儲唔到七百幾萬即係退唔到休？定啲嚟定啲嚟，答案無絕對，視乎你想要嘅退休生活質素。例如有人嚮往環遊世界嘅豪華退休生活，就自然要儲更多「彈藥」備用；而有啲人過簡簡單單生活就已經足夠，咁呢個數目或者夠用有凸。

退休有數得計

咁你呢？搵幾多先夠你退休？唔使估估下，有好嘢益你！只要準備幾個數字，同埋已經ready畀你用嘅退休策劃計算機，撳幾個掣就知道你理想嘅退休生活需要幾多錢，同埋你去到65 歲嗰陣儲到嘅MPF同其他儲蓄滿唔滿足到呢個金額。成個退休full picture出晒嚟，係咪對退休更加有把握呢？

等等！唔好心急住，都話咗要準備幾個數字，睇埋點搵呢幾粒數先可以更加準確咁計你條數：

「3D」退休，邊「D」穩陣啲？

計完條數發現將來份老本掹掹緊？「得啦到時再算。」會咁諗嘅你，少年你真係太年輕了。船到橋頭未必會自然直，而退休儲備都唔會自動增值。如果退休老本唔夠使，或者有人會用「3D」儲蓄法嚟開源、節流：「使少D」、「賺多D」或者「儲多D」。

但係邊「D」先至最work？「使少D」就可能要降低生活質素；靠重鎚集中投資喺高風險資產諗住短時間內「賺多D」，又驚大跌市時蝕到入肉。「儲多D」就似乎最穩陣，除咗每個月定額儲起一筆做退休儲備，有埋複息效應嘅加持，本金加利息咁「錢滾錢」，就可以用時間幫你再「儲多DD」。 以上例子話你知，時間就係儲蓄嘅好拍擋。 如果每月儲$3,000，淨回報有5%，儲10年連本帶利就有$47萬，係本金嘅1.3倍；而你再堅持儲落去，儲到40年，總共可以滾存$460萬，係你本金嘅3.2倍（fatfat啦，比實際你每個月儲落嘅40年本金多咗三百幾萬）！

當你愈儲得耐，儲備嘅增長率就愈高，呢個就係複息效應嘅威力—利用長時間，將利息加於本金之上繼續投資再賺更多利息，令到你嘅儲蓄倍增。時間同耐性，係複息效應嘅致勝關鍵。

同樣地，你嘅強積金正正就係應用咗複息效應，透過僱主同僱員每月定時定額供款，喺你幾十年嘅打工生涯默默咁幫你「儲多Ｄ」，累積基本退休保障。

講到尾，時間就是金錢，及早持之以恆建立儲蓄習慣，積少成多嘅威力隨時令退休生活有180度嘅轉變。今日嘅付出，係為將來嘅自己帶來更大嘅回報，即刻計好條數開始儲蓄，「退休唔使做」就唔再係FF啦。