meme緊你幫緊你 ──

求其揀，結果都係自己受番

要識揀，其實唔難

唔識揀都唔使咁快放棄治療住嘅。好似強積金呢類退休投資有成三、四十年咁長，跟住以下呢個最基本原則揀投資組合，已經可以簡單咁平衡到投資風險同回報： 原來揀MPF都關年紀事？係㗎，揀基金嘅101係考慮自己嘅承受風險能力，而年齡就係影響承受風險能力嘅重要因素。

例如啱啱出嚟做嘢嘅後生仔，有的是時間，距離退休仲有幾十年，承受風險能力高啲，就算投資喺較高風險嘅基金，遇到跌市都仲有長時間追番。反而如果佢哋太集中投資喺低風險基金，有機會因為預期回報低而錯過咗資產增值嘅黃金時間。

相反，臨近退休嘅人返工生涯開始進入倒數階段，同時代表得番好短時間可以投資儲老本，touch wood投資突然有咩閃失嘅話，好可能唔夠時間收復失地，承受風險能力自然較低。試諗下如果仲all in晒喺價格波動大嘅高風險基金，見住個市好似過山車咁起起跌跌，個心都離一離；唔好彩嚟一場大跌市嘅話，筆退休金隨時蒸發一大截，本來打算安樂退休嘅計劃凍過水，真係諗起都覺得陰功（喊出嚟）。

具體啲講，即係唔同年紀、人生階段應該揀邊類基金比較啱啲？

唔識揀，現成方案唔使煩

「講就輕鬆，但人生已經很難，仲要喺唔同人生階段揀唔同基金，對我呢個投資P牌仔嚟講未免太難。」唔驚唔驚，有好嘢幫到你。

無論你參加咗邊一個強積金計劃，都有一個叫做「預設投資策略」（ DIS ）嘅現成投資方案，專為唔識揀基金嘅投資初哥或者冇時間打理MPF嘅大忙人而設，DIS最正嘅地方就係會隨住你年齡增長而幫你自- 動 - 降 - 低 - 風 - 險！

咁筍嘅方案係點做到？首先，DIS由兩種基金組成： 當你揀咗DIS，喺你50歲前你嘅MPF就會全部投資喺較高風險嘅「核心累積基金」。到你50歲，受託人就會開始幫你逐步減持「核心累積基金」，同時增持較穩健嘅「65歲後基金」（放心啦，你唔使畀任何指示就自動搞掂）；喺咁樣一邊減一邊加嘅調整下，去到65歲你嘅MPF就會全數投資喺「65歲後基金」。 你睇，DIS咪正正就係幫你自動執行，長線投資最基本原則 — 按人生階段選擇投資組合、隨年齡增長降低風險囉。

DIS嘅兩種基金都會分散投資喺唔同市場同資產，就算其中一個市場或者資產出現短期價格波動，都仲有基金入面其他資產穩定成個投資組合，咁就更加放心。而且DIS收費上限0.95%，基金嘅收費同開支少咗，淨回報咪變相多咗，穩陣之餘仲有著數添！

學咗揀MPF基金嘅101，仲畀埋個慳水慳力嘅現成方案你，以後唔使再求其亂揀啦！不過無論你交畀DIS投資又好，自信滿滿咁自選基金都好，都要定期睇住你嘅投資表現，睇下儲到幾多老本，先知距離理想退休目標仲有幾遠路。