主頁 6大強積金投資決策點 5種主要強積金基金 5大退休策劃 實用工具及資源
挑選基金挑選計劃額外供款轉職處理調整組合退休處理 介紹「積」檔案一覽表 按人生階段策劃退休評估退休生活需要為退休累積財富檢討退休投資組合提取退休儲備 強積金投資資訊及工具退休策劃工具多媒體專區專題文章刊物及單張社交媒體平台詞彙表常用連結

meme緊你幫緊你 ──
世上無煩事,只要有statement!

「MPF?唔check啦,肯定好多數字要睇,太複雜喇。」對於投資初哥嚟講,聽到管理戶口同投資通常都會怯一怯,原因不外乎以下兩個:
  • 唔知可以點check
  • 啲文件好多數字好難明

話晒MPF投資橫跨幾十年,係退休儲備嘅其中一個重要部份,如果因為唔識或者覺得難搞就話「不了」,連自己個戶口有幾多錢都唔知,又點樣令幾十年後嘅退休生活secured?到退休嗰刻先發現退休金掹掹緊,無辦法財務自由,到時決定點過退休生活嘅就唔係你,而係你嘅老本,嗰陣先後悔點解後生時唔𥄫實啲已經太遲喇。

唔想退休都要過住「睇餸食飯」嘅日子咁閉翳,不如而家開始由淺入深學下點打理強積金。只要你肯理,就實有好嘢幫到你。

一張statement 睇晒結餘賺蝕

仲喺MPF新手村嘅你,可以由最基本嘅入門級方法做起,就係log in入你嘅MPF戶口度,望下你嘅MPF「成績表」—周年權益報表,入面有晒你MPF戶口過往一年嘅供款同投資表現:
  • 帳戶收支(包括供款、權益轉移及基金交易)
  • 帳戶結餘
  • 帳戶賺蝕

雖然周年權益報表有幾頁紙咁長,但只要跟住下圖就一眼搵到重點㗎喇:

一個平台 基金表現高低立見

睇完自己嘅MPF成績表,如果有需要調整自己嘅投資組合,都要做下功課,等自己嘅退休投資經驗值再level up!醒你一個唔使課金嘅工具啦,強積金基金平台有齊所有MPF基金嘅資訊,入面有三大功能幫你輕鬆搵到需要嘅資訊:
  • 我的選擇:可以直接揀幾個基金比較回報、收費同風險等
  • 基金表現圖表:以圖表方式睇晒各個基金回報表現
  • 基金資訊表:詳細列出各個基金嘅重要資料

知道你做得投資當然緊張回報,可以撳入去「基金表現圖表」,有圖、少字更易明,仲畀你分門別類咁睇五年/十年嘅年率化回報比較:
  • 唔同基金類別嘅比較(例如股票基金VS債券基金)
  • 同類基金中個別基金嘅比較

舉個例,你想知某個強積金計劃入面嘅股票基金,同市面上其他計劃嘅同類型基金嘅往績相比,係跑贏、中規中矩定係落後,就可以咁做:
除咗可以比較唔同計劃嘅同類型基金表現,其實仲睇到同一計劃下同一基金種類嘅回報㗎。睇番上圖,計劃A嘅亞洲股票基金回報率約為2%,環球股票基金回報率大約10.8%,而香港股票基金就大約有7%嘅回報!即係話就算係同一個強積金計劃、同一個基金種類,表現都有機會受唔同市場嘅經濟影響,而回報都有差別。所以斷估唔係無痛苦,唔好單靠基金種類而估佢嘅表現,要花少少時間睇真啲。

一click 隨時隨地check實戶口

當你出咗MPF新手村,下個stage就要養成主動檢討投資嘅好習慣。例如踏入人生新階段,小至轉工,大至結婚買樓,都應該睇睇你嘅投資組合啱唔啱你嘅風險承受能力。用齊以上介紹嘅工具,check實自己嘅MPF投資唔再係難事。

當然,唔使等到周年權益報表出爐先再plan嘅,隨時log in入受託人提供嘅網上平台,咁就幾時都可以睇住投資現況或者調整投資組合,打理投資就更方便。
×